مقارنه بين الويندوز واللينكس

هنتكلم النهارده عن انظمه التشغيل بالاخص الويندوز واللينكس وهنعمل مقارنه بينهم واغلبكم هيغير رأيه في نظام التشغيل بتاعه ان شاء الله

في الاول لازم تبقي عارف يعني ايه نظام تشغيل

 

نظام التشغيل 

عبارة عن وسيط بين المستخدم والسوفت وير والهارد وير ويخليك تشتغل علي الجهاز بتاعك 

ومن اشهر انواع انظمه التشغيل 

ويندوز و اندرويد ولينكس و اي او اس و ماك او اس وكلهم نفس الاستخدام فرق الاي او اس والاندرويد معمولين للموبايلات والايفون والباقي للكمبيوتر



كل نظام تشغيل برمجيات مسئوله عن اداره اجزاء الكمبيوتر
يعتبر مهمته الاساسية انه يديرلك الرام والبروسيسور وكل حاجه ويتجاوب معاك فيها وهنشرح كل حاجه بالتفصيل وكل شئ لوحده في مرة تانيه

---

نخش عالمفيد . . .

نبدأ بالويندوز

 

ويندوز هو نظام تشغيل مقدم من شركه مايكروسوفت وهو من اشهر انظمه التشغيل ان لم يكن اشهرها واللي كان بدا في الثمانينات اصدروا اول اصدار للويندوز وكان اسمه Windows 1 طبعاً محدش يسمع عنه لانه منجحش بس مايكروسوفت طورت من نفسها وعملوا اصدار تاني windows 2 مانجحوش قوي يعني بس كان احسن بكتير من الاول وبداو يطوروا لحد 95 و 98 اللي عملوا طفره في انظمه التشغيل وطوروا معني الواجهه الرسومية واللي هي من الاسباب الرئيسية في نجاح الويندوز 

الواجهه الرسومية دي للي مش عارفها هي الحاجات اللي انت شايفها بعينك زي المقال  دلوقتي او بمعني اصح هي كل الزراير والقوائم والنوافذ علي عكس انظمه مكانتش لسه اشتغلت بالواجهات الرسومية وكانوا بيشتغلوا من الطرفيه اللي هي الشاشه السودا دي اللي فيها كلام بالابيض والاخضر زي اللي بتيجي في الافلام بس ولان شركه مايكروسوف هي اللي محتكره الويندوز ومش مسموح لحد انه يطور فيه او يعدل عليه فبيفضل الويندوز زي ماهو بالاصدارات اللي مايكروسوفت بتنزلها وطبعاً سعرها بيكون غالي جداً الويندوز الي احنا شغالين عليه دا مجرد نسخه مضروبة بكراك او سيريال مزيف ودي بتكون مشكله انه كتير الويندوز بيحصل فيه مشاكل بسبب الكراك وانه يطلب تفعيل وكدا بس برغم كدا ويندوز هو من اكثر انظمه التشغيل شهره واستخدام

مميزات الويندوز بقي 

قولنا انه واجهه رسومية ومقفول المصدر يعني محدش بيلعب فيه ويخربه فدا معناه يكاد يكون مفيش اخطاء اما الاخطاء اللي بنشوفها دي عبارة عن سوء استخدام زي انك مش مثبت التعريفات او في ملف اتمسح او شئ من هذا القبيل
وكل فتره بينزل تحديث للحماية ومعاك دعم فني في حاله ان كنت شاري النسخه الاصلية
ومن اهم المميزات هي تعدد البرامج وتوفر الالعاب يعني تلاقي شركة زي ادوبي تروح تستثمر في ويندوز بانها تعمل برامج زي الفوتوشوب واللايت روم والافتر ايفكت  والالعاب زي شركه EA Sport و UbiSoft كل فتره ينزلوا العاب كويسة بتشد الجيمرز للويندوز

فنقدر نقول ان اهم مميزات الويندوز

• واجهه رسومية متميزة 
• اخطاء اقل
• تحديثات للحماية
• تعدد البرامج والادوات

 

 

 امال ايه العيوب

اهم عيوب الويندوز انه مقفول المصدر واحتكاري يعني  الوحيد اللي من حقه التعديل عليه هي مايكروسوفت نفسها ودا مش بيدي مجال للمبرمجين انهم يطوروا من النظام او يشوفوا المصدر وبكدا التحديثات هتبقي مقتصره علي الشركه بس

طب بالنسبة للمستخدمين العادين ايه هي العيوب 

سعره غالي بالنسبة لنظام تشغيل يعني مثلا نسخه زي xp اللي اتوقف دعمها من سنين طويل سعرها معدي ال90 $ وويندوز 10 بعد خصم 25% سعره كان 3 الاف جنيه مصري 

طب بالنسبه لشعب الكراك العظيم اللي انا منهم ايه هي العيوب 

برغم حمايته اللي مهتم جداً بيها هو اضعف نظام تشغيل من حيث الحماية في طرق كتير للتجسس عليه وطرق كتير لكسر الحماية ويعتبر مغناطيس فايروسات يعني لازم كمان تجيب برنامج حماية ودا برضوا غالي وكل شوية تحديثات ولو محدثتش برنامج الحماية بتاعك كل كام يوم اعرف انه ملهوش لازمه الفايروسات بتطور زي البكتريا بالظبط 

وطبعا الاغلبيه سمعوا عن ال WannaCry الفايروس اللي هز عرش مايكروسوفت في 2016 دا غير الفايروسات اللي بتنزل من الاعلانات اللي بتتتفتح فجأة

فيعتبر اقوي عيوب الويندوز هي الحماية

من اشد العيوب برضوا انه مش لاستخدام العمر الطويل يعني انت لو بتشتغل علي برامج مختلفه فعمر الويندوز معاك مظنش انه هيزيد عن السنتين بالكتير وبعدها يبدأ تهنيج دا لو مكنش قبل كدا بكتير وبعد التهنيج تبدأ تبان الاخطاء الناتجه عن البرامج اللي بتخش علي بعض فالويندوز عمره مش طويل في حاله النسخه المكركه 

وكمان مواصفات الجهاز الويندوز بيتطلب امكانيات عاليا يعني لو انت مستخدم معالج بينتيوم 4 مع رام 512 او الكمبيوتر بتاعك من ابو كرتونه متحلمش بويندوز 8 او 10 حتي 7 هيشتغل ضعيف جداً دا لو اشتغل كل ماينزل تحديث كل مايتطلب جهاز اقوي

يعني عيوب الويندوز باختصار 

• مقفول المصدر
• تمنه غالي
• حماية ضعيفه
• عمره مش طويل
• بيحتاج اجهزة كويسة عشان يعيش

كدا عرفنا حاجات كويسة عن الويندوز اغلبها مش جديدة نخش عاللينكس بقي

---

اللينكس

 

هنطول في شرحه شوية وممكن نكمل في منشور تاني لان الاغلبيه مايعرفوش عنه اي حاجه بس هكتفي هنا بايه هو اللينكس وايه عيوبة ومميزاته 

نظام اللينكس او بيخلف عن نظام الويندوز خالص يعني قولنا ان الويندوز كان غالي واحتكاري لكن اللينكس مجاني 100% ومفتوح المصدر يعني اي حد خبرته في البرمجه نفس خبرة حمدي الوزير بتكنولوجيا النانو وعلم الذره يقدر يعدل علي نظام اللينكس ويعمل نسخه خاصة بيه يكون عامله بنفسه مبنيه علي اللينكس
النسخه في الينكس اسمها توزيعه 

فنقدر نقول ان توزيعه اللينكس هي نظام تشغيل مبني علي نواه اللينكس 

يعني انت دلوقتي مبرمج وعدلت علي اللينكس وعملت نسخه سميتها atech يبقي كدا توزيعه atech هي توزيعه مبنيه علي نواه اللينكس ونواه اللينكس معناه مشتقه من نظام اللينكس لكن من التوزيعه للتانية هتلاقي البرامج اللي نازله معاها مختلفه وشكل النظام مختلف والتنظيم حتي شكل مدير الملفات مختلف من التوزيعه للتانية وكل توزيعه هتلاقي ليها سبب معين معموله علشانه ومتركزه عليه وهنشرح اشهر التوزيعات واستخداماتها في منشور مختلف 

اللينكس في البداية كان معتمد عالطرفية * الشاشة السودا* بنسبه 100% كان كله حاجه عن طريق سطر الاوامر ودا كان مخلي استخدامه مقتصر عالمحترفين بس لكن بعد كدا ربنا كرمه وبقي في واجهات رسومية احسن من الويندوز نفسه وبقي اسهل في الاستخدام 

  نيجي بقي للمميزات

 زي ماقولت فوق هو نظام مفتوح المصدر بيتيحلك انك تعدل علي ي جزء مش عاجبك
يعني مثلاً في الويندوز كلنا بنشتغل بنفس متصفح الملفات اللي اسمه explorer ومفيش غير للويندوز ومش بيتشال وغصب عن اي مستخدم ويندوز لازم تشتغل بيه لكن في اللينكس تقدر بكل بساطه تشيله وتجيب غيره وفيه  برامج بديله ليه كتير ولو ولا واحد عجبك تقدر تعمل واحد بنفسك وتحطه 

وهكذا كل شئ متاح تشوفه بيشتغل ازاي من ورا الستارة دا غير انه بالشكل دا وفرلك الاااف التوزيعات اللي تقدر تجربها علي عكس الويندوز اللي هم 10 نسخ موراهمش غيرهم

طريقة التثبيت في ويندوز طول عمرها كانت اسهل من اللينكس انت هتحط الاسطوانه ودوس install بس لكن في اللينكس الموضوع كان معقد بس دا كان زمان دلوقتي التثبيت اسهل من كدا بكتير وتقدر تتحكم في الحاجات اللي هتثبتها بشكل افضل واغلب التوزيعات بتديلك خيار انك تجرب التوزيعه قبل ماتثبت عشان لو ماعجبتكش ماتثبتش عالفاضي يعني انت دلوقتي وانت قاعد تقدر تحمل اي توزيعه بتدعم التجربة وتحطها علي فلاشه وتجرب اللينكس قبل ما تشيل الويندوز

اما بالنسبة للتوافق مع الاجهزه فانت ممكن تشغل احدث اصدار للاوبنتو مثلاً علي بنتيوم 4 عادي مش هيقولك لا والله فبكدا مع اللينكس هتنسي التهنيج لفتره طويلة ونادرة متلاقي تهنيج معاك وتقدر تسيبه شغال سنتين تلاته متواصل من غير مايحتاج اعاده تشغيل طالما موفر تبريد كويس للمعالج عشان كدا السيرفرات دايماً بتكون من اللينكس تخيل كدا مثلاً لو جيت تفتح الفيس قالك معلش الجهااز مهنج وهنرستر الويندوز

الحماية هي اهم حاجه في اي نظام تشغيل في الويندوز انت لما بتفتح بتفتح بصلاحيات المدير فليك الحق انك تعمل اي حاجه في الجهاز وبكدا ممكن فايروس ينزل من غير متاخد بالك وتشغله من غير ماتحس ويوصل هو كمان لنفس صلاحياتك ويبدا من هنا الاختراق لكن في لينكس لا انت بتفتح كمستخدم مش اكتر لكن في حاله انك عايز تثبت برنامج او اداه بيطلب منك اذن المدير واللي اسمه اذن الروت تقريباً اغلبكم سمع عنه في الاندرويد ودا لان الاندرويد اصلا مبني علي نواه لينكس بس هنتكلم عنها مرة تانية المهم لما بتدي للجهاز صلاحية الروت بينفذ الامر دا وبعد مابيخلص بينسي ان انت المدير خلاص فاي فايروس هينزل ودا مش موجود لان محدش بيعمل فيروسات للينكس عشان الفايروس يشتغل هيتطلب منك الاذن واكيد انت مش هتديهوله 

اما بالنسبه لواجهه المستخدم الرسومية فدي مبقتش حاجه وحشه خالص لان زي ماقولت اي حد يقدر يعمل لنفسه ادواته الخاصة فهتلاقي واجهاات مختلف كتيره وفي توزيعات كتير معموله للشكل الانيق بس

فنقدر نقول ان اهم مميزات اللينكس

• واجهه رسومية متميزة
• تجربة قبل الاستخدام
• متوافق مع الاجهزة الضعيفة
• حماية ممتازة
• مفتوح المصدر

امال العيوب ايه

زي مافيه مميزات اكيد في عيوب 

من عيوبه مثلاً انك كمستخدم للويندوز من يوم ما اتولدت وققرت تغير للينكس مش هتبقي واخد عالوضع لفتره لحد ماترتاحله 

من اكبر عيوبة هو السوفت وير برامج كير انت متعود عليها هتودعها زي مثلا Internet dowload manger و adobe photoshop لكن دا مش معناه انك هتفقد المميزات دي بالعكس ليهم بدائل مجانيه 100% تقدر تشتغل عليهم بنفس الجوده كمان ومساحات اخف + كل البرامج مفتوحه المصدر

المصدر المفتوح سلاح ذو حدين برغم انه جميل بس لو انت غاوي تجربة ممكن تسبب مشاكل كتير في الادوات او النظم هيترتب عليها اخطاء كتير فزي ما المصدر المفتوح ميزة فهو عيب في نفس الوقت 

والعيب الشرس فيه اللي خلي الاغلبيه يبعدوا هو الجيمينج لان الادوات اللي بتشتغل عالويندوز مش بتشتغل اللينكس زي الفرق بين الاندرويد والايفون وللسف ستديوهات الالعاب مش بتهتم باللينكس بس برنامج ستيم جه بمفاجأة وعمل توزيعه لينكس اسمها SteamOS واغلب العاب الويندوز اللي علي ستيم بقت تشتغل علي اغلب توزيعات اللينكس طب والالعاب المتكركه او اللي مش علي ستيم 

برضوا اتحلت في برنامج اتعمل اسمه Wine بيوفرلك انك تعمل بيئه عمل الويندوز جوا اللينكس فتشغل برامج الويندوز والعاب الويندوز جوا اللينكس ودا حل مشكله الالعاب بس الاداه لسه تحت التطوير فمش كل حاجه هتشتغل 

يعني عيوب اللينكس باختصار 

• اخطاء عن الاستخدام الخاطئ
• نقص في البرامج
• نظام جديد عالمستخدم
• الجيمرز مش هيوصلوا لاحدث العابهم منه

كدا لخصنا اللينكس بس هنتكلم عنه كتير في منشورات تانية



ملحوظه صغيره مهمه جداً

تقدر انك تسطب لينكس وويندوز في وقت واحد عشان تقارن بنفسك من غير ضرر علي الجهاز

اقرء المزيد

كل شئ عن الروت

ما هو الروت

هو شئ تقوم به لتنتقل من صلاحيات المستخدم العادي الي مستخدم مطور اي يعني سوبر يوزر .. وهو عبارة عن عملية برمجية تتم في نظام اندرويد لفتح المجال لبعض التطبيقات التي تحتاج صلاحية روت للوصول الى جذر نظام اندرويد المبني على نواة لينكس (Linux) بشكل اعمق لتستطيع التغيير او التعديل و إضافة مميزات جديدة على النظام او الإستفادة القصوي من كل امكانيات جهازك ومن ادق التفاصيل فيه وعند عملية الروت سوف يتم إضافة تطبيق يسمى بـ Super User وسوف يكون المسؤل عن إعطاء الصلاحيات للتطبيقات الاخرى ويقوم بتخزين كافة المعلومات حولها في سجل خاص.
يعني باختصار انت بتكون متحكم بشكل اكبر في جهازك وفي ادق التفاصيل فيه

ايه هي فوائد الروت

1-تعديل في ملفات النظام مثل التعريب او اضافة مميزات جديدة.
عن طريق تطبيق Root Explorer او Es File Manger

2-تركيب ريكفري معدل .
 بيساعد في انك بتركب رومات مطبوخه او تغير اللوجو للتليفون او البوت انيميشن

3-تركيب او تثبيت رومات معدله او مطبوخه .
من اهم مميزات الروت طبعا لان فيه موبايلات مش بيكون ليها تحديث مثلا او شكلها بقي تقليدي ومحتاج تغير كامل فالحل في الرومات المعدلة

4-الحذف او التعديل على تطبيقات نظام اندرويد الاساسية.
طبعاً فيه تطبيقات مش بيكون ليها اي لازمه ومش بتتمسح لو انت عامل روت ممكن تمسح اي تطبيق عن طريق برنامج System App Remover

5-القيام بعمليات النسخ الاحتياطي الكاملة مع معلومات التطبيقات و إسترجاعها لاحقًا او تجميد التطبيقات كما في برنامج Titanium Backup.
مفيش غنى عنه طبعا لان احيانا بيكون فيه تطبيقات وليها اعدادات او العاب واصل فيها لمستوى عالي بتروح لما نعمل سوفت او نغير الروم لكن بالروت تقدر تعمل نسخ احتياطي للتطبيق بكل بياناته حتي لو Uninstall

6-تشغيل التطبيقات التي تحتاج الى صلاحية الروت.
زي تطبيق Wifi Kill اللي بيقطع النت عن المتصلين معاك في الشبكه او Androdumpper اللي بيخترق اغلب شبكات النت وغيرها كتير

7-تغير الاي بي IP في جهازك والذي يُمكنك من فتح سوق جوجل بلاي الامريكي وتحميل التطبيقات والالعاب منه التي تكون غير متاحه في بلدك عن طريق vpn smile emoticon أو Hola Vpn او غيرها كتير

8-تغيير نوع الخط في الاندرويد.
زي ما في تليفونات سامسونج بتدعم انك تغير خط الاندرويد تقدر برضوا في اى تليفون تغير شكل الخط بتاعك لخطوط كتيره جداً ببرنامج Font Installer

اضرار الروت

هو الروت ليه اضرار؟

مش بالظبط كدا الضرر الوحيد للروت هو فقدان الضمان ودي كمان ممكن يبقالها حل .

مفيش اضرار تاني ليه ولا فورمات ولا تهنيج ولا اي عيوب اخري غير لو انت استخدمته استخدام غلط

ازاي تعمل روت

في اكتر من طريقه انك تعمل روت وبتختلف من تليفون لتليفون بس الاشهر هي طريقه ال One Click Root عن طريق برنامج Kingroot او KingOroot او Farma Root وغيرهم كتير 

اقرء المزيد

الاندرويد يفوق الايفون

اولا: تعدد الشركات

في عالم الاندرويد انت مش مضطر تستخدم جهاز معين عشان تتمتع بالنظام، لان في العديد من الشركات اللي بتقدم اجهزة مختلفة من موبايلات بس زي تابلت و تليفزيونات وكاميرات…… الخ حتي دلوقتي بقيت تقدر تستخدمه علي اللاب توب بتاعك لو عايزو ك Theme عن طريق برنامج معين او كنظام كامل عن طريق RemixOS مثلا.
ده غير انك علي عكس الIOS ملتزم بجهازين بس او تلاته بيقدمولك نظام الIos لكن الاندرويد في شركات كتير زي سامسونج و سوني و HTC و هواوي….الخ

ثانيا: الاسعار المختلفة

دلوقتي انت تقدر تخش تجربة مع اللوليبوب مثلا او الكيتكات او حتي المارشميللو بمبلغ لا يتعدي 1000 جنيه مصري واقل كمان، وده بسبب وجود العديد من الشركات اللي بتقدم اجهزة اندرويد في فئات متعددة ما بين ال 500 جنيه وممكن توصل ل6000 جنيه علي عكس الIOS اللي لازم ترصدله مبلغ ضخم ممكن يوصل ل8000 جنيه بسبب غلو اسعار الايفون والايباد.

ثالثا: Customization

نظام الاندرويد المرن ومصدره المفتوح AOSP بيسمحلك تعدل عليه براحتك سواء شكل Status bar او الNavigation Drawer او حتي الicons. اي حاجة تخطر علي بالك ممكن تعدل عليها في الاندرويد بسهولة بالغة ومن غير تعقيد، وده مش بتلاقيه اطلاقا في الIOS (اللي واجهته ثابتة من اول نزوله في اول ايفون الي الان) بنفس الشكل اللي بتلاقيه في الاندرويد.

رابعاً: Widgets 

من افضل المميزات في الاندرويد وموجود منها حاليا بالالاف وليها استخدامات كتير جدا ومفيش تقريبا اي مستخدم اندرويد يقدر يستغني عنهم، وده اللي الIOS مفتقدها شوية.

خامساً: Custom launchers أو الثيمات

فاكرين موبايلات نوكيا القديمة ؟
كلنا كفاكرين الثيمز اللي كانت عليها اكيد
الاندرويد بقي غير مفهوم الثيمات خالص من مجرد تغيير في الالوان وشكل الIcons وخلاه تغيير شامل في الجهاز بيشمل الخلفيات و lockscreen و ringtones و notifications و icons و fonts حتي الBoot Animation و ال ستايل بتاع العرض كامل الثيمات غيرته، وتقريبا الثيمات القليلة جدا اللي في الايفون مش بتدي حتي نص المميزات اللي في ثيمات الاندرويد.
سابعا: الدعم الكامل من جوجل
إصدار شركه جوجل للنظام وهى واحده من أكبر شركات التكنولوجيا فى العالم .. جوجل بتدعم نظام الاندرويد بكل منتجاتها تقريبا اللي بتغني الجهاز عن برامج كتير بتستهلك مساحات كبيرة
منتجات جوجل مثل Google Docs, Gmail, Google Drive Google Maps, Google Music, Google+, Google Chrome وغيرها من المنتجات الأخرى وهو ماظهر تأثيره على أبل فى الأونه الأخيره عندما أرادت أن تستغنى عن خرائط جوجل مثلا وإعتمدت على خرائطها وهى أقل مايقال عنها بأنها خطوه كارثيه لأبل.

سادساً: Google Now

اللي ميعرفهوش هو المساعد الذكي الخاص باجهزة الاندرويد زي siri كده في الايفون ويعتبر علي حسب الارقام والاحصائيات احسن واذكي مساعد في العالم بسبب مميزاتو العديدة وسرعة فهمه وتحليله للكلام ورد فعله السريع هو اللي خلاه متفوق علي سيري و كورتانا.

سابعاً: Custom ROMs أو الروم المعدله

لو مقتنعتش باي سبب من اللي فاتو فاكيد هتقتنع بده لان دي تقريبا افضل مميزات الاندرويد علي الاطلاق، الاندرويد كنظام مفتوح المصدر خلي المطورين تبني العشرات من الرومات المعدلة اللي بتوفر تحديثات اكتر للجهاز وتعلي من الاداء وتقلل من استهلاك البطارية ومميزات تانية كتير متتعدش.

ثامناً: التطبيقات المجانيه

واضحة جدا الميزة دي وهي وجود اعداد اكتر بكتييير من التطبيقات المجانية علي الplay store اكتر من الapp store اللي في منها كتير مدفوع عليه، وغير كده التطبيقات المدفوعة في الاندرويد سهل تجيبها مجانا عن طريق مواقع كتيرة جدا بتوفرها عكس الios.

تاسعاً: Security

في IOS 5 في ثغرة المفروض القفل معمول عشان لو مش عايز حد يقلب في موبايلك سواء ارقام صور جهات اتصال كل واحد وليه سبب في ال IOS 5 كان لو وأنت عامل رمز وحد اتصل وانت مرضتيش حد هيفتح الشاشة من غير ما يعدي القفل هيسحب علي المكالمة هيتصل بي الرقم الاتصل بيك علطول من غير ما يطلب رمز.

في IOS 6 في ثغرة وأنت عامل رمز لو عملت مكالمة طوارئ هتعمل حركة بيها وبالقفل من خلالها هتقدر توصل لجهات الأتصال والصور.
في IOS 6.1.3 المفروض أن الثغرة الفاتت أتحلت هي اتحلت بس نزلت بشكل تاني عن طريق تكتب الرمز غلط مرة ودوس إلغاء ويكون معاك أداة فك الشريحة وتفضل دايس عالهوم لحد ما يجيب ال Control Voice وتطلب مكالمة طوارئ مثلا 123 وتشيل الشريحة هيدخلك علي الأسماء برده والصور زي ما كانت في IOS 6

فيIOS 7 في ثغرة هي أنك هتشوف الصور وتقدر تعملها شير او تمسحها عن طريق أنك وأنت عامل قفل لو رحت للكاميرا ودوست عالصور مش هيجبلك حاجة تروح للآلة الحاسبة وتعمل اي عملية حسابية وأنت بدوس = تدوس زرار البور وتفضل دايس وبعدين دوس Cancel ودوس علي زرار الهوم مرتين وتروح منه للكاميرا وتجيب الصور هتلقيهم ظهره عادي أو نفس الخطوات بس بدل الآلة الحاسبة المؤقت ونفس الخطوات.

فيIOS 7.1.1 في ثغرة بس لازم تكون مشغل خدمة Siri وأنت عامل رمز أنك تدوس ضغطة مطولة علي الهوم وبعدين تقول Open وتستني لما يخلص بعديت تقول Facebook هتلقي فتح الفيس عادي وهتطلع منه وهتخش فأي حاجة أنت عايزها.

فيIOS 9 في ثغرة أنك لو عامل قفل تكلم Siri وتقول Show me the time now هتقلك الساعة هدوس عليها وبعدين ندوس علي علامة ال + الفوق وتكتب اي حاجة تبحث عنها وبعدين تعمل Select all للنص اللي اتكتب وشير وتختار جهات انك تبعت رسالة هتلاقي كل جهات الاتصال عندك وتختار الاسم بعد متختاره ممكن تدوس عليه وتعدله او تعدل الرقم او تحط صورة يعني الصور هتتفتحلك كل دا وأنت قافل الفون.

اقرء المزيد